Enginn í bann en fullt af sektum

Njarðvíkingurinn Dominykas Milka, sem var rekinn út úr húsi undir lok leiksins, fékk fjörutíu þúsund króna sekt og Grindvíkingurinn Jordan Semple fékk áttatíu þúsund króna sekt en hann fékk óíþróttamannslega villu fyrir sinn þátt í ólátunum í leiknum á fimmtudaginn.

Grindavík fékk 250 þúsund króna sekt vegna framkomu áhorfenda sem fóru inn á völlinn og tóku þátt í stimpingum við leikmenn. Það var þó talið Grindvíkingum til málsbóta að gæslumenn brugðust hratt við aðstæðum og leystu vel úr þeim.

DeAndre Kane, leikmaður Grindavíkur, fékk fimmtíu þúsund króna sekt vegna átta tæknivillna sem hann hefur fengið á tímabilinu. Jóhann Þór Ólafsson, þjálfari Grindavíkur, fékk þrjátíu þúsund króna sekt þar sem hann hefur fengið sex tæknivillur í vetur.

Milka fékk tuttugu þúsund króna sekt vegna fjögurra tæknivillna á tímabilinu og þá fékk Grindavík þrjátíu þúsund króna sekt sem liðið fékk í leiknum á fimmtudaginn.

Alls nema sektirnir sem Grindavík fékk 440 þúsund krónum en Njarðvík fékk samtals áttatíu þúsund króna sekt.

Eftir leikinn sendi Grindavík frá sér yfirlýsingu þar sem félagið harmaði atvikið og sagði jafnframt að viðkomandi stuðningsmaður hefði beðist afsökunar.

Annar leikur Njarðvíkur og Grindavíkur fer fram í IceMar-höllinni í Njarðvík á mánudaginn. Njarðvíkingar unnu fyrsta leikinn með tíu stiga mun, 87-97.