„Í hausnum á mér er ég orðinn þessi maður“

Ágúst Orri Arnarson skrifar 8. apríl 2026 08:02

Emin Kadri Eminsson er fyrsti íslenski heimsmeistarinn í hnefaleikum, hann á bara eftir að láta draumana verða að veruleika. vísir / lýður valberg

Eftir að hnefaleikakvöldinu í Gamla Bíói var slegið á frest er Emin Kadri Eminsson óviss um hvenær eða við hvern hann mun berjast næst. Hann er þó orðinn vel vanur óvissunni eftir rúmt ár sem atvinnumaður í íþróttinni og stefnir alla leið í boxinu.

Þrátt fyrir þetta óvissuástand var Emin mættur á æfingu í hnefaleikaklúbbi Kópavogs í gær þar sem Sportpakki Sýnar leit við. Hann átti að berjast næsta föstudag og ætlaði svo að skella sér í smá frí eftir langa törn.

Bardaga hans á föstudaginn var hins vegar aflýst þannig að Emin veit ekkert hvað gerist næst en hann er líka orðinn nokkuð vanur því að vera í þessari stöðu.

„Já síðasta árið hefur verið svolítið mikið upp og niður af þessu. Alltaf einhverjir andstæðingar að draga sig úr keppni, ég að veikjast eða meiðast eða eitthvað þannig. Þetta hefur verið mjög langt og erfitt ferli, síðastliðið ár, þannig að ég er alveg vanur þessu. Og ef við getum ekki komist í gegnum það að einhverjum bardaga sé frestað eða einhverjar aðstæður koma upp sem við stjórnum ekki, þá erum við ekkert að fara að meika það í þessu.“

Orðinn heimsmeistari í hausnum

Og þú ert með stefnuna þar, að meika það í þessu?

„Í hausnum á mér er ég kominn þangað. Í hausnum á mér er ég orðinn þessi maður, bestur í heiminum, ég er heimsmeistari, fyrsti Íslendingurinn til að vera það. Ég á bara eftir að sanna það fyrir heiminum, að ég sé þessi manneskja sem ég segist vera.“

Heimsmeistaratitilinn er ekki í augsýn enn þá en atvinnumannaferillinn fer vissulega af stað. Emin hefur barist þrisvar sinnum, í Las Vegas, Mexíkó og Finnlandi, og unnið alla þrjá bardagana.

„Ég var bara frekar svekktur með síðasta bardaga að hafa ekki klárað hann [K.O.] en ég er að ná lotunum inn á móti frekar seigum andstæðingum. Ég er þakklátur fyrir það og hef náð í reynslu í þessum atvinnumannastíl. Að keppa ekki í bol, í minni hönskum. Ég er orðinn frekar vanur þessu núna. Þegar ég stíg inn í hringinn núna er ég miklu þægilegri og miklu betri.“

Dreymir um að keppa á Íslandi

Sú hindrun er hins vegar á hans vegi að atvinnumannahnefaleikar eru ekki löglegir á Íslandi. Emin kvartar hvorki né kveinar yfir ástandinu en dreymir um að keppa á Íslandi.

„Mig langar að keppa á Íslandi. Það hefur alltaf verið markmiðið okkar, draumurinn okkar, og við munum ná að gera það. En ef ég þarf að fara eitthvert til útlanda, keppa einhvers staðar í útlöndum, hvað sem ég þarf að gera. Ég geri það bara, læt það bara virka. Skiptir engu máli hvað gerist, við bara höldum áfram.“

Box

Mest lesið

Fleiri fréttir