Sjáðu lygi­lega körfu Kára sem fékk bara 0,4 sekúndur

Það er ekki skrýtið að Gummi Ben hafi misst sig þegar hann lýsti lokakaflanum á Hlíðarenda í kvöld, eins og sjá má í spilaranum hér að neðan.

Remy Martin kom Keflavík í 78-76 þegar 0,4 sekúndur voru eftir en sá tími dugði einhvern veginn Kára til að tryggja Val sigurinn með flautuþristi.

Dómarar leiksins þurftu að fara í skjáinn tvisvar á þessari lokasekúndu, fyrst til að meta hvenær boltinn hefði verið farinn í gegnum netið þegar Martin skoraði og svo til að meta hvort að Kári hefði náð að kasta áður en leiktímanum lauk. Sú var þó niðurstaðan.

Þar með eru Valsmenn komnir í 2-1 í frábæru einvígi liðanna í 8-liða úrslitum Bónus-deildarinnar í körfubolta og geta tryggt sig áfram í undanúrslit með sigri í næsta leik í Reykjanesbæ á miðvikudagskvöld.

„Mér líður hrikalega vel,“ sagði Kári eðlilega glaður. „Þetta var svakalegt skot hjá Remy. Ég sagði við Lazar [Nikolic sem sendi boltann á Kára úr innkastinu] fyrir þetta að ég gæti verið opinn í horninu. Þetta var geðveikt,“ sagði Kári.

Þetta er ekki í fyrsta sinn sem Kári setur flautuþrist í andlitið á Keflvíkingum og hægt að rifja upp fræga körfu hans yfir allan völlinn í einvígi með Haukum gegn Keflavík árið 2018.

„Þetta er kannski svipað á einhvern hátt. Ég hef miklu minni tíma til að hugsa. En þetta er svipað. Algjör snilld,“ sagði Kári áður en hann fór að fagna með félögum sínum.