Út­lit fyrir flókna meirihlutamyndun í borginni

Greint var frá því í morgun að líkur Vinstrisins á að ná þremur mönnum inn í borgarstjórn í Reykjavík færu vaxandi í nýuppfærðri kosningaspá Vísis. Sjálfstæðisflokkurinn og Samfylkingin eru enn jöfn en sjálfstæðismenn eygja nú möguleikann á að ná sjöunda manninum inn, einum fleiri en keppinauturinn. Um er að ræða kosningaspá Baldurs Héðinssonar stærðfræðings sem byggir á niðurstöðum skoðanakannana.

Flestir oddvitar með keimlíka pólitíska ásjónu

Eiríkur Bergmann stjórnmálafræðingur segir ýmislegt áhugavert í uppfærðri kosningaspá. Áfram sé ákveðið einvígi milli Sjálfstæðisflokks og Samfylkingar þar sem Sjálfstæðisflokkurinn sé aðeins að síga fram úr. Á meðan taki Miðflokkurinn stöðu Framsóknarflokks sem tapað hafi miklu fylgi og sé í myljandi hættu á að ná ekki manni inn.

„Síðan eru stóru tíðindin þau að það mikla sóknarfæri sem hefur opnast á vinstri væng íslenskra stjórnmála, það er svona að byrja að fyllast með Vinstrinu sem er að ná töluvert góðri stöðu þar. Það eru auðvitað stóru tíðindin.“

Eiríkur segir að með prófkjörum og vali á framboðslista hafi mál hagast þannig að oddvitar flestra annarra flokka hafi keimlíka pólitíska ásjónu. Eiríkur segir það gera sérstöðu Vinstrisins miklu skýrari heldur en annars hefði verið, þrátt fyrir að Sósíalistaflokkurinn sé einnig í framboði.

„Maður á von á því að vinstra fylgið finni sér einhvern farveg á einn stað og Vinstrið ætlar að verða sá farvegur. Það virðist vera.“

Hvernig sérðu fyrir þér meirihlutasamstarf?

„Það er bara flókið að sjá það fyrir akkúrat núna. Samfylkingin hefur auðvitað verið meira og minna við völd í að verða 32 ár með stuttum hléum, þannig það eru margir sem vilja senda Samfylkinguna í einhverskonar leyfi, í orlof. Þannig það þrengist aðeins um það og þetta gæti bara orðið flókið.“