Antonelli hélt upp­teknum hætti

Eftir fimm vikna frí fór Formúlan aftur af stað með látum en veður setti ekki strik í reikninginn eins og óttast var, brautin hélst þurr þó nokkrum dropum hafi rignt.

Antonelli var þarna að fagna þriðja sigrinum í röð og Ítalinn ungi styrkir enn frekar stöðu sína í efsta sæti heimslistans.

Antonelli var fyrstur af stað en missti forystuna strax frá sér, á sama tíma og Max Verstappen snerist næstum því út úr brautinni en bjargaði sér rétt svo.

McLaren ökumaðurinn Lando Norris náði forystunni en missti hana svo frá sér á 29. hring.

Norris náði þó öðru sætinu og liðsfélagi hans hjá McLaren, Oscar Piastri, varð þriðji.

Á lokahringnum lenti Charles Leclerc í stórkostlegum vandræðum og, að því er virðist, einhvers konar vélarbilun. Bíllinn lét allavega mjög illa að stjórn og bæði Max Verstappen og George Russell tóku fram úr honum þannig að Leclerc endaði sjötti.

Áður höfðu Pierre Gasly og Liam Lawson lent í árekstri, en þeir sluppu báðir óhultir.