Upp­selt á innan við þremur mínútum á þriðja úr­slita­leikinn

Grindavík er 2-0 yfir í einvíginu eftir glæstan sigur gegn Tindastóli á Sauðarkróki í gærkvöldi. Grindvíkingar geta því tryggt sér sinn fyrsta Íslandsmeistaratitil síðan 2013 og sópað Stólunum í sumarfrí á föstudaginn kemur.

Miðasala fór í loftið um sex leytið en á innan við þremur mínútum var allt orðið uppselt.

„Ég held að þetta hafi náð svona tveimur og hálfri mínútu, þetta var svakalegt,“ segir Óli Björn Björgvinsson, verðandi formaður körfuknattleiksdeildar Grindavíkur.

Leyfi er fyrir 1200 manns í HS-Orku höllinni í Grindavík í heildina. Að frádregnum leikmönnum og starfsmönnum gera það um 1100 áhorfendur. Styrktaraðilar UMF Grindavíkur fengu sinn skerf af miðum en um 950 miðar fóru í almenna sölu að sögn Óla Björns.

„Það er bara kjaftfullt hús. Algjörlega stappað. Við verðum með 80 courtside miða og einhverja VIP miða líka. Þetta fauk allt út bara á tveimur og hálfri mínútu.“

Eins og lesa má úr ummælum á Facebook síðu körfuknattleiksdeildar Grindavíkur fengu ekki allir miða sem hefðu viljað. 

Svokallað Fan-Zone verður sett upp í gamla íþróttahúsinu í Grindavík. Þar munu miðalausir stuðningsmenn liðsins, sem og aðrir, getað horft á leikinn í góðri stemningu.

„Við breyttum því bara í Fan-Zone og það verður alveg geggjuð stemning þar. Ég er alveg viss um að það verði haugur af fólki þar. Við munum sýna leikinn á risatjaldi og það verður eitthvað svakalegt.“

Leikur Grindavíkur og Tindastóls fer fram á föstudagskvöld. Bein útsending verður á Sýn Sport Ísland frá 18:30.