Sjálf­stæðis­flokkur stærstur en nær ekki meiri­hluta með Miðflokki og Fram­sókn

Ef könnunin reynist sannspá bætir Sjálfstæðisflokkurinn við sig tveimur fulltrúum í borgarstjórn og fer úr sex í átta. Fylgi flokksins hefur ekki mælst hærra frá því í ársbyrjun en þá var það 24,4 prósent en flokkurinn er með 31,3 prósenta fylgi í nýjustu könnun Maskínu.

Samfylkingin er næststærst samkvæmt niðurstöðum könnunarinnar og heldur sínum fimm fulltrúum. Aftur á móti hefur fylgi Samfylkingarinnar dalað undanfarið og mælist nú 19,4 prósent. Það er talsvert minna en þau 26,1 prósent sem flokkurinn mældist með hjá Maskínu í janúar. 

Viðreisn og Vinstrið mælast nú með þrjá fulltrúa rétt fyrir kosningar, Miðflokkurinn tvo, Framsóknarflokkurinn einn og Sósíalistaflokkurinn einn. Flokkur fólksins, Píratar, Góðan daginn og Okkar borg mælast ekki inni í borgarstjórn. Athygli vekur að Miðflokkurinn mælist hér með einn færri borgarfulltrúa samanborið við könnun Gallup sem birt var í dag. Á sama tíma mælist Viðreisn með einn til viðbótar. Könnun Maskínu fór fram tólfta til fimmtánda maí en Gallup ellefta til fimmtánda maí. 

Niðurstöður allra nýjustu kannana verða dregnar saman í nýrri kosningaspá Vísis sem birt verður að morgni kjördags. 

Tapa fulltrúum í gríð og erg

Í könnun Maskínu er fallið hæst fyrir Pírata sem fengu þrjá fulltrúa 2022 en Flokkur fólksins, sem mælist ekki inni, er í dag með einn borgarfulltrúa.

Vinstrið er með 11,0 prósenta fylgi á meðan Viðreisn er með 12,0 prósenta fylgi samkvæmt niðurstöðum Maskínu. Miðflokkurinn, sem hefur verið að mælast ansi jafnt síðan í janúar, nær tveimur inn samkvæmt könnunni og er með 9,8 prósenta fylgi.

Könnunin fór fram dagana tólfta til fimmtánda maí og voru svarendur sem tóku afstöðu til flokks um tæplega þrjú þúsund. Var hún lögð fyrir hóp fólks á netinu sem dreginn var með tilviljun úr Þjóðskrá. Allir svarendur eru átján ára og eldri með búsetu í Reykjavík en svörin voru vegin samkvæmt mannfjöldatölum Hagstofunnar um kyn, aldur og menntun svo að þau endurspegluðu betur þýðið.