Fótbolti

Þjálfari Juventus pirraður á fagnandi Alberti

Ágúst Orri Arnarson skrifar
Albert virðist hafa farið eitthvað í taugarnar á Luciano Spalletti, eða kannski var það bara tapið.
Albert virðist hafa farið eitthvað í taugarnar á Luciano Spalletti, eða kannski var það bara tapið. Andrea Martini/NurPhoto via Getty Images

Albert Guðmundsson og félagar í Fiorentina sóttu 0-2 sigur gegn Juventus í 37. umferð ítölsku úrvalsdeildarinnar. Fiorentina fór langt með að eyðileggja Meistaradeildardrauma Juventus.

Albert hefur verið að glíma við meiðsli undanfarið og kom því inn af varamannabekknum í dag, um miðjan seinni hálfleik. Staðan var þá 1-0 eftir mark Cher Ndour og Rolando Mandrago átti eftir að skora markið sem tryggði Fiorentina 2-0 sigur.

Mesta fjörið í kringum Albert var í uppbótartímanum og eftir leik. Hann fékk gult spjald fyrir að tefja í uppbótartíma og í miðjum fagnaðarlátum eftir leik átti hann í orðaskiptum við Luciano Spalletti, þjálfara Juventus.

„Ekki snerta mig,“ á þjálfarinn að hafa sagt þegar Albert lagði hönd á öxl hans.

Með þessu tapi, og samtíma sigrum AC Milan og Roma, eru vonir Juventus um Meistaradeildina á næsta tímabili nánast horfnar en hlutirnir gætu óvænt snúist í lokaumferðinni.

AC Milan vann 2-1 sigur gegn Genoa, liði Mikaels Egils Ellertssonar. Sigurinn fer langt með að skila liðinu Meistaradeildarsæti og kom þökk sé mörkum Christopher Nkunku og Zachary Athekame.

Johan Vazquez minnkaði muninn fyrir Genoa undir lok leiks en Mikael Egill var utan hóps.




Fleiri fréttir

Sjá meira


×