Hinn fjór­tán ára Venni vann í Noregi

Vernharður er aðeins 14 ára gamall en keppti gegn sterkustu ökumönnum Noregs í keppninni í sínum flokki, ásamt ökumönnum sem keppa reglulega erlendis á alþjóðlegum vettvangi.

Helgin byrjaði þó erfiðlega fyrir Venna en hann var dæmdur aftastur í rásröð í tímatökum vegna tæknilegs formsatriðis samkvæmt norskum reglum og þurfti því að hefja keppni úr 25. sæti. Það virtist þó kveikja enn frekar í honum í hinum unga íslenska ökuþór.

Byrjaði fimmti en vann

Hann vann sig jafnt og þétt upp ráslistann með glæsilegum akstri. Í úrslitum ræsti hann fimmti en keyrði sig upp í fyrsta sæti og endaði á því að vinna keppnina sannfærandi.

Samtals vann hann sig upp um 53 sæti yfir helgina og vakti frammistaða hans mikla athygli í norska mótorsportheiminum. Þetta kemur fram í tilkynningu frá AKÍS, Akstursíþróttasambandi Íslands.

„Venni sýndi Norðmönnunum virkilega hvað í honum býr og pakkaði þeim hreinlega saman. Þetta vakti mikla athygli bæði hjá þeim sem voru á staðnum og einnig hjá fólki sem fylgdist með keppninni úr fjarlægð,“ segir Ragnheiður R. Vernharðsdóttir móðir Vernharð eftir keppnina.

Kom ekki á óvart

„Eftir keppnina kom norski Formúlu 2-ökumaðurinn Martinius Stenshorne sérstaklega til Venna til að óska honum til hamingju með árangurinn og ræða við hann um keppnina,“ segir Jón Þór Jónsson, formaður AKÍS, og bætir við að árangur Venna hafi ekki komið honum á óvart.

„Venni hefur verið hluti af afreksstarfi AKÍS í nokkurn tíma og hefur sýnt að hann býr yfir miklum hraða, einbeitingu og metnaði. Hann er með mjög skýra sýn á hvert hann stefnir og setur sér háleit markmið. Það sem skiptir líka miklu máli er að baki honum stendur sterkt teymi. Foreldrar hans og aðstoðarlið deila þessum markmiðum með honum og hafa stutt gríðarlega vel við hans vegferð,“ bætir Jón Þór við.