Kaldvík sett í skammar­krókinn í Ósló

Í tilkynningu á vef Euronext segir að ákvörðun um að setja félagið í skammarkrókinn taki þegar gildi. Hún sé tekin á grundvelli reglna um skammarkrók kauphallarinnar, sem er fyrst og fremst ætlað að upplýsa fjárfesta um að félög hafi ekki skilað ársreikningi.

Samkvæmt fjárhagsdagatali Kaldvíkur fyrir árið 20265 stóð til að birta ársreikning fyrir síðasta ár þann 30. apríl síðastliðinn. Þann 27. apríl tilkynnti félagið að ekki myndi nást að klára ársreikninginn og endurskoða hann fyrir áður tilkynntan birtingardag. 29. apríl var tilkynnt að reikningur yrði birtur 28. maí síðastliðinn og loks var tilkynnt 27. maí að hann yrði birtur 12. júní.

Samkvæmt reglum Euronext skal ársreikningur birtur eins fljótt og auðið er eftir lok reikningsársins og eigi síðar en fimm mánuðum eftir það.