Kjartan Smári hættur hjá Íslandssjóðum

Í tilkynningu þess efnis á vef Íslandsbanka, eiganda Íslandssjóða, segir að hann hafi tekið við starfinu árið 2016 og síðan þá leitt félagið í gegnum mikilvægan vöxt og uppbyggingu. Íslandssjóðir séu í dag eitt stærsta og öflugasta sjóðastýringarfyrirtæki landsins, með 387 milljarða króna í stýringu í lok síðasta árs.

Kjartan Smári verði félaginu og starfsfólki þess áfram innan handar næstu mánuði til að tryggja farsæla yfirfærslu verkefna.

Kjartan hafði nýlega haft uppi stór orð um kjaradeilu Icelandair og flugmanna þar sem hann sagði þá halda félaginu í gíslingu og það stefndi að óbreyttu í gjaldþrot eftir samanlagt tugmilljarða tap yfir síðustu ár.

„Í öllum öðrum fyrirtækjum væru starfsmenn sem tækju þátt í slíku einfaldlega reknir með skít og skömm. Og látnir sæta ábyrgð,“ sagði Kjartan í pistlinum sem birtist á Facebook-síðu hans. Vísar hann hér til meintra óformlegra verkfallsaðgerða flugmanna þar sem þeir hættu um tíma að selja frídaga sína til fyrirtækisins þegar áhafnaskortur var. 

Halldóra Skúladóttir, forstöðumaður eignastýringar hjá Íslandssjóðum frá árinu 2017, taki við stöðu framkvæmdastjóra tímabundið þar til stjórn félagsins hefur ráðið nýjan framkvæmdastjóra. Hún búi yfir víðtækri reynslu af fjármálamarkaði og þekkingu á starfsemi félagsins. Áður hafi hún starfað sem forstöðumaður hjá Íslandsbanka og hafi alls 26 ára reynslu í greininni.