Hitnar í kolunum: McGregor hnakkreifst við Holloway

Ekki er um titilbardaga að ræða þó þeir séu báðir fyrrum UFC meistarar. Þeir hafa einu sinni mæst áður, snemma á ferlinum. Þá í fjaðurvigt. McGregor vann bardagann, sem var aðeins annar bardaginn á UFC ferli hans, í júlí 2013, á dómaraákvörðun.

McGregor hefur ekki barist síðan þann 10. júlí 2021 þegar hann fótbrotnaði í tapi gegn Dustin Poirier og hefur frægðarljóminn dvínað frá því að Írinn varð á sínum tíma fyrsti tvöfaldi UFC meistarinn. Vandræði í einkalífinu hafa sett strik í reikninginn hjá McGregor sem snýr aftur í búrið núna og segist betri en nokkru sinni áður.

Bardagi McGregor og Holloway verður í veltivigt en kapparnir mættust í beinni útsendingu með Joe Rogan sem sýnt var á bardagakvöldi UFC við Hvíta húsið síðastliðna nótt. Þar hitnaði í kolunum.

„Ég hef hlustað á fólk halda því fram að Max sé pund fyrir pund besti bardagakappinn í sögu fjaðurvigtardeildarinnar. Þegar að ég skólaði hann til í þeim þyngdarflokki,“ sagði Conor og hélt áfram. „Ég hef líka hlustað á fólk segja að Holloway hafði verið krakki þegar að við börðumst síðast. Á þeim tímapunkti var að ræða sjötta bardaga hans, annan bardaga minn.“

Orðaskipti McGregor urðu snörp og hvöss og var erfitt að greina hvað fór almennilega þeirra á milli. En þegar að írski vélbyssukjafturinn er kominn af stað þá er erfitt að stoppa hann.

„Max. Þú munt ekki ná höggi á mig,“ sagði McGregor. „Jafnvel ef þú myndir gera það þá mun ég hlæja framan í þig. Þetta er allt annar heimur þegar að þú stígur inn í bardagabúrið með mér. Allt annar heimur í þessum þyngdarflokki,“ bætti McGregor við en bardaginn verður sá fyrsti hjá Holloway í veltigvigt, sá þriðji hjá McGregor sem telur sig munu sleppa óskaddaður frá bardaganum gegn Holloway.