Bjóða 250 þúsund krónur fyrir stað­setningu hval­veiði­skipanna

Í sameiginlegri færslu Watsons og samtaka hans á miðlinum Instagram kemur fram að skip þeirra, Bandero, nái aldrei að komast í návígi við hvalveiðiskipin vegna þess að Landhelgisgæslan deili staðsetningu Bandero í rauntíma.

Samtökin bjóða nú peningaupphæð fyrir hvern þann sem fært getur þeim rauntímaupplýsingar um staðsetningu Hvals 8 og Hvals 9 svo Bandero geti „skorið á leið þeirra“.

„Þetta er Aðgerð ´86,“ segir í lok færslunnar og er þar líklega vísað til atburðanna 1986 þegar samtök Watsons sökktu tveimur íslenskum hvalveiðiskipum, Hval 6 og Hval 7, í Reykjavíkurhöfn.

Færslan inniheldur myndband þar sem áhafnarmeðlimir Bandero stíga fram og óska eftir frekari upplýsingum eða fjárframlögum svo hægt sé að hækka peningaverðlaunin enn frekar. Í máli þeirra kemur fram að langreyðar séu dýrategund sem sé í viðkvæmri stöðu.

„Við höfum hægt á drápunum en höfum ekki getað stöðvað þau enn,“ segir einn áhafnarmeðlima.

Þór, varðskip Landhelgisgæslunnar, hafði fylgt Bandero eftir eins og skugginn í rúmlega viku frá því að það kom til landsins en þurfti frá að hverfa í gær vegna annarra þarfra verkefna, líkt og vatsskorts í Flatey.

Gagnrýnt hefur verið, meðal annars af framkvæmdastjóra Samtaka fyrirtækja í sjávarútvegi, að íslensk stjórnvöld hafi deilt upplýsingum sem innihéldur staðsetningu skipanna þar sem slíkt ógnaði öryggi starfsfólk. Matvælastofnun breytti í kjölfarið vinnulagi sínu.