Sextán ára nýliði í landsliðinu: „Við erum að velja þær af því þær eru svo góðar“

Ágúst Orri Arnarson skrifar 21. ágúst 2026 09:50

Pekka Salminen er landsliðsþjálfari kvennaliðs Íslands í körfubolta. vísir

Landslið Íslands í körfubolta er mætt til Portúgal þar sem stelpurnar okkar munu spila æfingaleik við heimakonur síðar í dag og aftur á morgun. Sextán ára nýliði er í hópnum en landsliðsþjálfarinn segir þetta verkefni vera gott tækifæri fyrir unga leikmenn liðsins.

Æfingaleikirnir við Portúgal marka formlegt upphaf á nýju körfuboltatímabili hjá kvennalandsliðinu, liði sem er að ganga í gegnum ákveðin kynslóðaskipti. Margir ungir leikmenn eru í leikmannahópnum og fá tækifæri til að heilla landsliðsþjálfarann.

„Auðvitað eru margar hérna sem hafa verið að spila lengi fyrir landsliðið og þekkja kerfið. Svo eru hinar sem hafa bara verið hér í nokkra daga, það tekur þær auðvitað svolítinn tíma en þess vegna er svo mikilvægt að við fáum þessa aukaleiki. Ég er mjög ánægður með það. Vanalega er það líka þannig að lið nota leikmann af því þær eru ungar, við erum að velja þessa leikmenn af því þær eru svo góðar. Þannig að þetta er auðvelt fyrir mig og það er ótrúlegt hversu hratt þær komast inn í hlutina og hafa góðan skilning á leiknum.“

Berglind Katla Hlynsdóttir er ein þeirra sem gæti spilað sína fyrstu A-landsleiki en hún hefur verið að stíga stór skref á sínum ferli í allt sumar. Berglind spilaði einnig á EM undir 20 ára í júlí og var síðan valin besti leikmaður Evrópumóts undir 16 ára leikmanna fyrr í þessum mánuði.

„Ég var bara spennt sko, ég veit ekki,“ sagði Berglind aðspurð um viðbrögðin við landsliðskallinu. Hún átti ekki von á því að vera valin í lokahópinn en hefur verið að æfa með liðinu.

Flestir þekkja föður Berglindar, Hlyn Bæringsson, fyrrum landsliðsmann í körfubolta til fjölda ára. Hlynur er rúmlega tveggja metra maður sem spilaði sem miðherji. Berglind fær ágætis hæð frá föður sínum en er öðruvísi leikmaður.

„Ég er svona hávaxinn point guard (leikstjórnandi) en ég get spilað aðrar stöður.“

Berglind Katla klár í fyrsta A-landsliðsverkefnið.vísir / BJARNI

Annar nýliði er í A-landsliðshópnum, Emma Theodorsson, sem hefur alla tíð búið í Bandaríkjunum en áður spilað fyrir yngri landslið Íslands og samdi við nýlega við lið Njarðvíkur.

„Ég þekki margar þeirra úr yngri landsliðunum og við Þóranna Kika vorum reyndar herbergisfélagar í háskólanum í Chicago, svo ég þekki margar stelpnanna nú þegar… [Íslenska tungumálið] kemur hægt og bítandi hjá mér. Liðsfélagarnir hafa verið mjög hjálplegir með það,“ sagði Emma, á ensku.

Fjallað var um kvennalandsliðið í körfubolta í Sportpakka Sýnar í gærkvöld. Innslagið má sjá hér fyrir ofan.

Fyrri leikur Íslands og Portúgal hefst klukkan 16:00 í dag. Seinni æfingaleikurinn hefst klukkan 09:45 í fyrramálið.

Landslið kvenna í körfubolta