Heiðurs­manna­sam­komu­lag var svikið: „Kom okkur á ó­vart“

Egypska landsliðið í handbolta er hætt við að koma hingað til lands og spila tvo æfingaleiki við Íslands skömmu fyrir HM í janúar á næsta ári. Áfall í undirbúningi liðsins en leikirnir áttu að fara fram nokkrum dögum fyrir fyrsta leik strákanna okkar á HM.

„Þetta kom okkur á óvart og er leiðinlegt. Við vorum búnir að semja við Egyptana um að fara fyrst til þeirra, sem við gerðum, og fá svo Egyptana heim til þess að geta verið lengur hér heima í aðdraganda HM. Egyptar eru sterk þjóð, góðir í handbolta og vorum við því mjög spennt fyrir þessu verkefni. En þetta heiðursmannasamkomulag sem við vorum með okkar á milli, þeir sviku það,“ segir Jón Halldórsson formaður HSÍ í samtali við Stefán Árna Pálsson, íþróttafréttamann Sýn.

Það getur reynst erfitt að finna verðugan andstæðing fyrir Egyptana sem hefðu verið frábær andstæðingur til þess að máta sig við fyrir HM. Margar af sterkustu þjóðum handboltans eru nú þegar búnar að geirnegla sinn undirbúning. 

„Þetta er bara búið, við ætlum ekkert að hengja haus yfir þessu. Við erum búin að vera vinna að því núna í nokkrar vikur að finna landslið til þess að koma og spila við okkur hér í janúar. Það er enn markmiðið okkar. Að spila tvo heimaleiki hér fyrir framan þjóðina í janúar. Við róum öllum árum að því.

En Egyptarnir, eins og þú segir sjálfur, þetta er góð handboltaþjóð og hefði verið frábær undirbúningur fyrir HM fyrir landsliðið.

„Já þetta var draumaundirbúningur. Við vorum búin að teikna þetta svoleiðis upp. En þetta eru bara aðstæðurnar sem við lendum í og eigum við ekki að segja að þær séu óstjórnanlegar. Þá þurfum við bara að bregðast við því. Við erum með öflugt teymi. Snorri Steinn og hans fólk í liðinu leitar að réttu lausninni fyrir liðið.“

Eru þið að ræða við einhverjar þjóðir núna?

„Snorri Steinn er núna að kanna þessa hluti. Það er ekkert fast í hendi en ég geri þó fastlega ráð fyrir því að það verði leikir hér heima í janúar. Þá aðallega til þess að lengja tímann sem strákarnir hafa hér heima saman í aðdraganda HM. Stórmót taka langan tíma. Eins og á síðasta Evrópumóti vorum við 31 dag úti. Það væri þægilegt að geta stytt það um viku.“

Viðtalið við Jón Halldórsson, formann HSÍ, sem sýnt var í Sportpakkanum á Sýn í gær má sjá í spilaranum hér ofar í fréttinni.