Ætlar að taka sér pásu út tíma­bilið

Í gær birti Tara Davis-Woodhall færslu þar sem hún tjáði að hún myndi ekki keppa meira á árinu 2026. Þetta er áfall fyrir hana enda er hún á toppi ferilsins þessa stundina. Hún varð Ólympíumeistari í langstökki í París árið 2024 og varð heimsmeistari í langstökki ári seinna.

Í færslunni sinni á Instagram lagði hún þó áherslu á að hún myndi koma til baka og að allt gerðist af ástæðu.

„Ég veit að þetta verður að vera hluti af minni sögu. Ég mun aldrei efast um leiðirnar sem Guð setur fyrir framan mig. ÉG MUN KOMA TIL BAKA.“

Fyrir innan við viku deildi Davis-Woodhall því að hún hafi lent í árekstri sem hafði andleg áhrif á hana en hún slapp við lífshættuleg meiðsli. Hún fékk þó slæman heilahristing sem hefur verið erfitt að jafna sig á. Samkvæmt nýju færslunni hennar virðist hún þó vera staðráðin í að yfirstíga vandræðin og koma til baka.

World Athletics Ultimate Championship verður haldið í fyrsta skipti um helgina. Þar koma saman Ólympíumeistarar, heimsmeistarar og meistarar Demantsmótaraðarinnar og keppa í sínum greinum. Davis-Woodhall mun því missa af þessu móti en búist er við að allar helstu stjörnur frjálsíþróttaheimsins mæti.