Fúll yfir tapi London: HM í frjálsum fer í fyrsta sinn til Afríku

Mótið eftir þrjú ár verður fyrsta heimsmeistaramót fullorðinna sem haldið er í Afríku. Ljóst er að ekki eru allir par sáttir og Matt Lawton, íþróttafréttastjóri breska blaðsins The Times, skrifaði á X: „Þetta þýðir þrjú heimsmeistaramót í röð utan Evrópu. Ótrúleg ákvörðun hjá Alþjóða frjálsíþróttasambandinu.“

Aðspurður í ummælum hvað væri svona ótrúlegt við ákvörðunina, svaraði Lawton: „Þrjú heimsmeistaramót í röð utan Evrópu. Gríðarleg lyfjamisnotkun í Kenía. Ég hefði viljað sjá meiri tíma varið í það og að Afríka fengi mótið 2031 en Evrópa 2029.“

Sebastian Coe, forseti Alþjóða frjálsíþróttasambandsins, segir umsókn Kenía hafa verið „hrífandi og tilfinningaþrungna.“

„Við vorum svo lukkuleg að fá fjórar framúrskarandi umsóknir vegna HM 2029 og 2031 svo þetta var ekki auðveld ákvörðun fyrir nefndina.

Með ákvörðun okkar í dag höldum við áfram að stefna að útbreiðslu frjálsíþrótta um allan heim með því að næstu þrír gestgjafar verði í Asíu, Afríku og Evrópu,“ sagði Coe en næsta HM verður árið 2027 í Peking.

Aðeins níu ár eru síðan að London hélt HM síðast, eða árið 2017. Þjóðverjar héldu síðast HM árið 2009 þegar mótið var haldið í Berlín, og því líða 22 ár þar til mótið fer svo aftur fram í Þýskalandi, í München árið 2031.

Eins og fyrr segir verður mótið 2029 það fyrsta sem haldið er í Afríku en það mun fara fram á Kasarani-leikvanginum. Þar standa yfir miklar endurbætur áður en þar verður spilað á Afríkumótinu í fótbolta á næsta ári.

Keníumenn urðu í 2. sæti yfir verðlaunahafa á HM í fyrra þegar þeir unnu sjö gullverðlaun og alls ellefu verðlaun.