Bjarki Steinn fót­brotinn og verður ekki með

Þrátt fyrir að hafa orðið fyrir meiðslunum í leik með Südtirol í ítölsku B-deildinni um helgina kom Bjarki Steinn engu að síður hingað til lands með öðrum í landsliðinu og fór í frekari myndatöku hér heima.

Hann verður líklega frá í um tíu vikur vegna meiðslanna og mun því engan þátt taka í komandi landsleikjum Íslands við Eistland (tvisvar), Lúxemborg og Búlgaríu.

Bjarki Steinn er 26 ára bakvörður sem á að baki sjö landsleiki.

Ekki hefur verið ákveðið hvort annar leikmaður verði kallaður upp í stað Bjarka Steins að svo stöddu.

Guðlaugur Victor Pálsson verður að líkindum í hægri bakverðinum gegn Eistlandi á laugardaginn kemur á Laugardalsvelli. Mikael Egill Ellertsson og Mikael Neville Anderson geta leyst stöðuna en eru betri annars staðar.

Ákveði þjálfarateymið að kalla mann í stað Bjarka Steins í hópinn eru Dagur Dan Þórhallsson, Alfons Sampsted og Valgeir Lunddal Friðriksson menn sem hafa verið í undanförnum hópum.

Ísland mætir Eistlandi á laugardaginn kemur, 26. september klukkan 16:00. Leikurinn verður sýndur beint á Sýn Sport, líkt og allir leikir landsliðsins í Þjóðadeildinni.