Ó­keypis að sjá vonar­stjörnur Ís­lands og Frakk­lands

Ísland mætir stjörnum prýddu liði Frakklands í fyrri leiknum, á morgun klukkan 15 á Þróttarvelli.

Í franska hópnum eru leikmenn á borð við Mathys Tel úr Tottenham og Ethan Mbappé, litla bróður Kylians, sem er liðsfélagi Hákonar Arnars Haraldssonar hjá Lille.

Leny Yoro, miðvörður Manchester United, var einnig í hópnum en hefur nú verið færður upp í A-landsliðið í stað Ibrahima Konaté sem er meiddur.

Ísland var afar nálægt því að ná í stig gegn Frökkum á útivelli í vor en tapaði 2-1, þar sem Daníel Tristan Guðjohnsen skoraði mark Íslands úr víti.

Daníel er aftur í U21-hópnum núna sem og leikmenn á borð við framherjann Viktor Bjarka Daðason, sem slegið hefur í gegn með FC Kaupmannahöfn, Benoný Breka Andrésson markametshafa í efstu deild hér á landi, Eggert Aron Guðmundsson úr Brann og markvörðinn Lúkas Blöndal Petersson sem er á mála hjá Hoffenheim.

Ísland mætir svo Sviss næsta þriðjudag, einnig klukkan 15 á Þróttarvellinum. Ísland er í baráttu við Sviss um 2. sæti riðilsins sem dugar til umspils um að komast í lokakeppni EM. Sigurlið riðilsins fer beint á EM.

Frakkland er með 16 stig í efsta sæti, eftir sex leiki, en Sviss er með 14 stig og Ísland 11, eftir sjö leiki af tíu. Færeyjar eru svo með 9 stig í 4. sæti, Lúxemborg með 4 stig og Eistland 2.

Leikur Íslands og Frakklands er klukkan 15:00 á morgun og verður sýndur beint á Sýn Sport. Leikur Íslands og Sviss á þriðjudaginn klukkan 15 er einnig á Sýn Sport.