Fundu elsta skips­flak heims

Þetta er þó í raun ekkert skipsflak enda er viðurinn sem skipið var smíðað úr búinn að eyðast eftir þúsundir ára á hafsbotni. Keramíkamfórur sem skipverjar voru með um borð hafa þó varðveist öll þessi ár sem og akkeri sem gerð voru úr steini.

Fornleifafræðingar kynntu sér hönnun amfóranna og báru hana saman við gögn um hvaða stílar voru notaðir á hvaða tímabilum á svæðinu. Kannanir á hönnuninni leiddu í ljós að amfórurnar voru að öllum líkindum gerðar í Egyptalandi eða Miðausturlöndum og 4.400 til 4.700 ára gamlar. 

Kekovaeyja er við suðurströnd Tyrklands og er merkt með rauðri pílu á kortinu hér fyrir neðan.

Nú er unnið að því að skoða amfórurnar nánar og reynt að finna út úr því hvað var geymt í þeim þegar skipið sökk. Í grein BBC er haft eftir fornleifafræðingi við Macquarie-háskóla í Ástralíu að mögulega hafi það verið ólífuolía, vín eða trjákvoða. 

Fyrir uppgötvunina var elsta skipsflak heims 4.200 ára gamalt skip sem fannst við strendur Dokos í Grikklandi. Elsta skipsflakið þar sem viðurinn hefur varðveist er 2.400 ára gamalt og fannst í Svartahafi.