Eyjagrýla FH-inga lifir góðu lífi í Heimaey

ÍBV tekur á móti FH í kvöld í átta liða úrslitum Coca Cola bikars karla í handbolta en í boði er sæti í bikarúrslitahátíðinni í Laugardalshöll.

Eyjamenn eru búnir að vinna báða leiki liðanna í Olís deildinni í vetur og hafa haft mikið tak á FH-ingum úti í Eyjum undanfarin ár.

FH-ingar þurfa að losa takið Eyjagrýlunnar ætli þeir sér að verja bikarmeistaratitilinn sem þeir unnu í fyrra. ÍBV vann bikarinn árið 2018 og þetta eru því bikarmeistarar síðustu tveggja ára.

En aftur af vandræðum FH-inga á Heimaey. FH hefur nú tapað sjö síðustu leikjum sínum úti í Vestmannaeyjum eða öllum leikjum sínum síðan að þeir unnu eins marks sigur 25. nóvember 2016.

Síðan eru liðnir 38 mánuðir eða nákvæmlega 1168 dagar.

Í þessum sigri FH-liðsins í Eyjum fyrir þremur árum og rúmum tveimur mánuðum þá var Óðinn Þór Ríkharðsson markahæstur hjá liðinu með sex mörk en hann spilar nú sem atvinnumaður í Danmörku.

Báðir deildarleiki liðanna í vetur hafa verið æsispennandi og unnist á einu marki. Dagur Arnarsson skoraði sigurmark ÍBV í síðasta leik í desember í Kaplakrika en Hákon Daði Styrmisson skoraði sigurmarkið í leik liðanna í Eyjum í september. Fannar Þór Friðgeirsson átti stoðsendinguna í báðum mörkunum.

Hákon Daði Styrmisson er með 18 mörk í þessum tveimur leikjum á móti FH en hann þekkir vel til Hafnarfjarðar eftir að hafa spilað með Haukum í nokkur ár.

Petar Jokanovic hefur líka verið FH-ingum erfiður í ÍBV markinu í þessum leikjum. Hann varði 19 skot í fyrri leiknum (48%) og 15 skot í þeim síðari.

Síðustu leikir ÍBV og FH í Vestmannaeyjum:

23. september 2019 - Deild - ÍBV vann 1 marks sigur (23-22)

22. apríl 2019 - Úrslitakeppni - ÍBV vann 8 marka sigur (36-28)

24. mars 2019 - Deild - ÍBV vann 2 marka sigur (31-29)

17. maí 2018 - Úrslitakeppni - ÍBV vann 7 marka sigur (29-22)

12. maí 2018 - Úrslitakeppni - ÍBV vann 6 marka sigur (32-26)

26. febrúar 2018 - Deild - ÍBV vann 8 marka sigur (37-29)

9. mars 2017 - Deild - ÍBV vann 9 marka sigur (30-21)

25. nóvember 2016 - Deild - FH vann 1 marks sigur (24-23)