Með fjölda dóma á bakinu

Tvítugur maður var í gær dæmdur í eins árs fangelsi fyrir þjófnað í Héraðsdómi Reykjaness. Maðurinn fór fyrr á árinu í heimildarleysi inn í íbúð í Hafnarfirði þaðan sem hann hafði á brott með sér verðmæti fyrir um eina milljón króna. Maðurinn hefur áður hlotið átta dóma og hefur alls verið dæmdur í eins árs fangelsi. Þá var maðurinn í febrúar síðastliðnum dæmdur í tólf mánaða fangelsi, þar af níu mánuði skilorðsbundið, í Héraðsdómi Vesturlands. Hann rauf því skilorðið með brotinu. Eigandi munanna sem stolið var setti fram bótakröfu, sem var vísað frá. Ákærða var gert að greiða allan sakarkostnað.