Risatré brotnaði

Risavaxið tré í garði í Efstasundi 6 í Reykjavík bókstaflega kubbaðist í sundur í óveðrinu í fyrrinótt. Ekkert skemmdist þó þegar tréð slengdist til jarðar, en íbúar vöknuðu við skruðninginn. Íbúi að Efstasundi 6 kvaðst hafa vaknað, ásamt barni sínu, um miðja fyrrinótt við mikla skruðninga. Taldi íbúinn að þeir væru af völdum óveðursins sem geisaði um nóttina. Í gærmorgun kom hins vegar í ljóst að lætin voru ekki einungis af völdum veðurs. Stórt tré, sem staðið hafði í garðinum hafði brotnað um miðjan stofn og lagðist hluti þess yfir innkeyrsluna. Íbúinn kvaðst vera nýfluttur þannig að hann vissi ekki hversu gamalt tréð væri. Það væri brotið í tvennt en héngi uppi á nokkrum tægjum í stofninum. Ekki væri búið að hafa samband við eigandann, en það yrði gert áður en það yrði fjarlægt. Íbúinn sagði að engan skemmdir hefðu orðið af völdum trésins þegar það féll.