Snjóflóðahætta á Patreksfirði

Sex íbúðarhús voru rýmd á Patreksfirði nú fyrir hádegið vegna snjóflóðahættu en flóð féll úr hlíðinni fyrir ofan bæinn í morgun og niður á götuna Mýrar. Engin hús eða mannvirki eru þar sem flóðið féll þótt það sé innan byggðarinnar. Þar hafa snjóflóð fallið áður. Þá féll flóð úr Raknadalshlíð á þjóðveginn í nótt og lokaði leiðinni til Barðastrandar en hann hefur nú verið ruddur. Að sögn Tómasar Jóhannessonar á Veðurstofunni er vitað um nokkur smærri flóð utan byggða á sunnanverðum Vestfjörðum en hvergi er talin hætta í vöktuðum byggðakjörnum, nema í húsunum sex á Patreksfirði. Annars er fylgst grannt með framvindu mála því við skilyrði eins og núna, þegar snjór hafur fallið ofan á harðfenni og svo rignir ofan í það í hláku, getur orðið talsverð hreyfing, í það minnsta á efsta snjóalaginu. Viðbúið er að flóð hafi fallið hér og þar utan byggða án þess að hafa valdið tjóni og án þess að nokkur hafi tekið eftir því.