Við erum betri núna

Rafael Benitez telur að Liverpool sé með betra lið nú en í fyrra og segir að það muni ráða úrslitum í annars jafnri viðureign liðsins við Chelsea í Meistaradeildinni í kvöld, rétt eins og í slag liðanna í ensku úrvalsdeildinni um næstu helgi. "Leikir þessara liða hafa alltaf verið mjög jafnir og úrslitin hafa oftar en ekki ráðist á smáatriðum. Það má ekkert útaf bera í þessum leikjum, en ég held að það sem muni ráða úrslitum fyrir okkur núna, er að við erum með betri og stærri hóp en í fyrra," sagði Benitez. "Fólk talar um að Chelsea vilji hefna ófaranna hér á Anfield síðan í fyrra, en við höfum að því að keppa að vera taplausir áfram og við viljum svo sannarlega ekki tapa fyrir Chelsea. Þeir eru ekki ósigrandi og ég tel mig vita hverjir veikleikar þeirra eru og kem til með að reyna að nýta mér þá," sagði hann.