Wenger hrósaði Henry

Arsene Wenger er yfir sig ánægður með gengi sinna manna í Arsenal í Meistaradeildinni í ár og þá ekki síður með framherja sinn Thierry Henry, sem í gærkvöld varð markahæsti leikmaður Arsenal frá upphafi þegar hann skoraði bæði mörk liðsins í sigrinum á Sparta Prag. "Thierry varð hálf skrítinn á svipinn þegar ég sagði honum að fara inná í kvöld og ég verð að viðurkenna að það að setja hann inná fyrir Reyes, var ekki það fyrsta sem mér datt í hug," sagði Arsene Wenger um ákvörðun sína að setja mann í engri leikæfingu inn á völlinn eftir aðeins fimmtán mínútna leik. "Það er hreint ótrúlegt að hann hafi náð að setja þetta met svona ungur að aldri. Hann er bara 28 ára gamall, en Wright var 33 eða 34 ára gamall þegar hann sló metið á sínum tíma. Henry hefur með þessu skipað sér stóran sess, ekki bara í sögu Arsenal, heldur í knattspyrnusögunni," sagði Wenger hrifinn.