Talsvert um skemmdarverk

Nokkuð var um skemmdarverk í umdæmi lögreglunnar á Selfossi í síðustu viku. Á föstudag voru unnar skemmdir á gulum Renault á Selfossi. Aðfaranótt laugardags var brotin rúða í Chevrolet í Þorlákshöfn, gler í biðskýli við Sunnulækjarskóla og rúða á gæsluvelli á Selfossi.

Rúða var brotin í Lindinni á Laugarvatni aðfaranótt sunnudags og önnur í sumarbústað á Skeiðum. Kaffikönnu var stolið úr sama bústað og braut þjófur einnig rúðu í öðrum bústað og stal þremur veiðistöngum. Borð og stólar voru brotin á tjaldstæði í Bjarnarskógi og talið er að börn hafi skemmt nokkra bíla í Þorlákshöfn.