Unnið eins hratt og kostur er

 Fátækt og úrræðaleysi einkenna aðstæður margra geðfatlaðra, að sögn Auðar Styrkársdóttur, talsmanns aðstandendahóps geðfatlaðra. Nú er búið að gera stórátak í búsetumálum fatlaðra en geðfatlaðir sitja eftir.

Sonur Auðar, sem á við geðsjúkdóm að stríða, getur farið í sjálfstæða búsetu eftir ár en þau úrræði eru ekki fyrir hendi nú.

Auður segir að skýrsla sem gefin var út um félagslegar aðstæður geðfatlaðra sýni að aðstæður þeirra séu í sumum tilfellum ekki boðlegar.

Geðdeildir LSH hafa hlaupið undir bagga og á Kleppspítala búa geðfatlaðir sem ættu í raun heima á sambýli.

Dagný Jónsdóttir, þingmaður Framsóknarflokksins, sem fer fyrir verkefnisstjórn um uppbyggingu í þágu geðfatlaðra, segir að í stjórninnni sé búið að vinna mikið starf. Hún segir að nú liggi fyrir grófur rammi um þau búsetuúrræði sem komið verði á fót á tímabilinu 2006 til 2010.

Í tengslum við verkefnisstjórnina skipaði félagsmálaráðherra fimm manna ráðgjafarhóp sem unnið hefur að málefnum geðfatlaðra.

Dagný segir að fyrstu búsetuúrræðin fyrir geðfatlaða verði tilbúin á þessu ári. Ég er sátt við gang mála í nefndinni, segir Dagný og bætir við að þar sé unnið eins hratt og kostur sé.