Skotið úr riffli nálægt manni

Skotið var af riffli nálægt manni við Óbrynnishóla við Hafnarfjörð í fyrrakvöld. Meðferðferð skotvopna þar er með öllu bönnuð en lögreglan í Hafnarfirði segir að nokkuð hafi borið á því að menn séu með byssur þar. Svæðið er gamalt skotsvæði.

Í fréttum NFS í gær var greint frá því að maðurinn hefði furðað sig á litlum viðbrögðum lögreglu við tilkynningunni en lögreglan segir tilkynninguna hafa verið öllu hógværari en fréttaflutning af henni. Guðmundur Sophusson, sýslumaður í Hafnarfirði, segir að málið verði kannað gaumgæfilega og gripið til aðgerða svo stemma megi stigu við meðferð skotvopna á svæðinu.