Efnin ætluð til söludreifingar

Rúmlega tvítugur karlmaður var dæmdur í 45 daga skilorðsbundið fangelsi í Héraðsdómi Reykjavíkur á þriðjudag vegna fíkniefna- og vopnalagabrota.

Maðurinn var handtekinn tvívegis í desember síðastliðnum. Við leit á honum og dvalarstað hans fundust 254,89 grömm af hassi og lítilræði af tóbaksblönduðu kannabisefni sem sannað þykir að ákærði hafi ætlað til sölu. Auk þess fannst svokallaður „butterfly“-hnífur í fórum hans.

Ákærði játaði skýlaust brot sín. Hann hefur margoft komið við sögu lögreglu áður.