Draga uppsagnir líklega til baka

Þeir tólf leikskólakennarar sem sögðu upp störfum á leikskólanum Sólbrekku á Seltjarnarnesi á fimmtudaginn síðasta munu að öllum líkindum draga uppsagnir sínar til baka, að sögn Ásdísar Þorsteinsdóttur aðstoðarleikskólastjóra.

Kennararnir sögðu upp vegna óánægju með kjör sín en þeir höfðu átt í viðræðum við bæjaryfirvöld á Seltjarnarnesi um sérstaka umbun vegna þess mikla álags sem verið hefur á starfsfólki leikskóla bæjarins í haust og vetur. Eftir að bæjaryfirvöld sögðust vilja hraða málinu funduðu leikskólakennararnir á föstudag og munu líklega draga uppsagnirnar til baka sem fyrr segir. Þeir hyggjast svo funda með bæjarstjóra á fimmtudag eða föstudag vegna málsins.