Wenger hefur áhyggjur af Campbell

Arsene Wenger, stjóri Arsenal, viðurkennir að hann hafi áhyggjur af varnarmanni liðsins Sol Campbell og segist hreint ekki vita hvenær hann muni sjá hann næst. Campbell virðist hafa farið í þunglyndiskast eftir að eiga mjög dapran dag í tapinu gegn West Ham á miðvikudagskvöld.

"Ég hef áhyggjur af Sol núna, því hann virðist vera mjög langt niðri. Ég veit ekki hver ástæðan er, aðeins hann getur svarað því," sagði Wenger, en Robert Pires tekur í sama streng.

"Sol átti slæman dag á móti West Ham, en þetta kemur fyrir alla á ferlinum. Ég hef reynt að ná í hann í síma, en það hefur ekki borið mikinn árangur. Hann veit þó að hann nýtur stuðnings félaga sinna hjá Arsenal," sagði Pires.