Lakers jafnaði í Phoenix

Kobe Bryant og félagar í LA Lakers jöfnuðu í nótt metin í rimmu sinni við Phoenix með góðum 99-93 sigri í Phoenix í öðrum leik liðanna og fara næstu tveir leikir fram í Los Angeles. Kobe Bryant hafði hægt um sig framan af leik en endaði með 29 stig og 10 fráköst. Steve Nash var atkvæðamestur í liði Phoenix með 29 stig og 9 stoðsendingar.

Þetta var fyrsti sigur LA Lakers á Phoenix í níu leikjum þar sem Steve Nash er í liði Phoenix. Liðin hafa tíu sinnum mæst í úrslitakeppninni og hefur Phoenix aldrei náð að komast í 2-0 í neinni seríu til þessa. Varamenn Lakers skoruðu 24 stig gegn aðeins 4 stigum varamanna Phoenix. Lamar Odom skoraði 21 stig fyrir Lakers og Raja Bell skoraði 23 stig fyrir Phoenix. 

Detroit var ekki í vandræðum með Milwaukee og sigraði 109-98. Tayshaun Prince skoraði 22 stig fyrir Detroit en Michael Redd setti 29 stig fyrir Milwaukee. Detroit hefur því náð 2-0 forystu í einvíginu en næstu tveir leikir fara fram í Milwaukee.

Þá vann Dallas annan sannfærandi sigurinn í röð á Memphis á heimavelli sínum 94-79 og hefur náð 2-0 forystu í einvíginu, en leikurinn var sýndur í beinni útsendingu á NBA TV. Dirk Nowitzki var aftur stigahæstur hjá Dallas með 31 stig, en Pau Gasol var með 16 stig fyrir lið Memphis sem enn hefur ekki unnið sigur í úrslitakeppninni í sögu félagsins.