Flugeldasýning í Sevilla

Leikur Sevilla og Real Madrid í lokaumferð spænsku deildarinnar í kvöld hefur svo sannarlega staðið undir væntingum, en sex mörk eru þegar komin í fyrri hálfleik. Leikurinn er sýndur beint á Sýn.

Það var Englendingurinn David Beckham af öllum mönnum sem kom gestunum frá Madrid í góða stöðu með tveimur mörkum á tíu mínútna kafla í upphafi hálfleiksins, en þá tóku nýkrýndir Evrópumeistarar félagsliða við sér og röðuðu inn þremur mörkum á aðeins sex mínútum og bættu við fjórða markinu rétt áður en flautað var til hlés.

Fyrsta markið skoraði Jesus Navas með ótrúlegum þrumufleyg af löngu færi og þá var komið að Javier Saviola að skora tvö mörk á örskömmum tíma. Fjórða markið skoraði svo Fabiano. Það er því ljóst að róðurinn verður Real Madrid þungur ef liðið ætlar sér að ná öðru sætinu í deildinni.