Drykkfeldar mæður stjörnuleikmanna til vandræða

Mæður stjörnuleikmannanna LeBron James hjá Cleveland og Amare Stoudemire hjá Phoenix eru sonum sínum ekki góðar fyrirmyndir, en þær hlutu báðar dóma fyrir óspektir og ölvunarakstur fyrir helgina. Móðir James slapp með sekt og félagsþjónustu, en móðir Stoudemire þarf að dúsa í fangelsi í þrjú ár eftir ítrekaðan ölvunarakstur.

Hin 38 ára gamla Gloria James slapp með skrekkinn eftir að hafa viðurkennt ölvunarakstur og óspektir, en hún skemmdi lögreglubíl þegar hún var handtekin vegna gruns um ölvun í janúar á þessu ári. Til stóð að James þyrfti að dúsa í fangelsi í hálft ár, en hún slapp með sekt og þarf að gegna félagsþjónustu og sitja námskeið um skaðsemi ölvunaraksturs.

Carrie Mae Stoudemire var þó ekki eins heppin, en hún hefur oft komið við sögu lögreglu vegna ölvunaraksturs. Hún steig fram fyrir dómara í fangelsisskrúða með ljósar fléttur í hárinu í gær og var dæmd í þriggja ára fangelsi fyrir ítrekuð brot á þessu sviði, en síðast ók hún utan í vegrið á þjóðveginum við Phoenix. Hin fimmtuga kona brotnaði niður í réttarsalnum og bað dómara grátandi afsökunar á hegðun sinni, en hún lofaði að fara í áfengismeðferð og sór að áfengi kæmi aldrei inn fyrir hennar varir aftur. Stoudemire hafði tvisvar áður verið tekin mjög ölvuð á bíl sínum. Sonur hennar var ekki viðstaddur dómsúrskurðinn.