Flokksbræður deila um greiðslur

Oddviti Samfylkingarinnar í Reykjavík segir nágrannasveitarfélög Reykjavíkur hafa svikist um að greiða til Strætós í samræmi við launahækkanir vegna nýs kjarasamnings. Flokksbróðir hans, bæjarstjórinn í Hafnarfirði, segir þetta með öllu rangt. Ráðist verður í stjórnsýsluúttekt á félaginu.

Þessum orðum Dags B. Eggertssonar vísar flokksbróðir hans Lúðvík Geirsson, bæjarstjóri í Hafnarfirið, alfarið til föðurhúsanna. Hann segir Hafnarfjarðarbæ hafa staðið skil á öllum þeim framlögum til Strætós sem samið hafi verið um.

Þær upplýsingar fengust frá Strætó bs. að öll sveitarfélögin sem eiga aðild að byggðasamlaginu hafi greitt það fé sem þau skuldbundu sig til að greiða þegar gengið var frá fjárhagsáætlun Strætós. Þegar sú fjárhagsáætlun var samþykkt var ekki tekið tillit til launahækkana og engar skuldbindingar um greiðslur vegna þeirra.

Tilkynnt var í dag að samið hafi verið við Deloitte og Touche um stjórnsýsluúttekt á Strætó bs. Þar skal farið yfir hversu vel hefur tekist til við rekstur fyrirtækisins. NFS greindi frá því í gær að ekki hefði verið leitað skipulega til almennings til að fá tillögur að þjónustu Strætós þegar ráðist var í umfangsmestu breytingar á leiðakerfi sem ráðist hefur verið í til þessa.