Kærir lausagöngu fola í Laxárdal

Bæjarstjórn Blönduóss hefur kært lausagöngu þriggja vetra graðfola, vegna ósæmilegs framferðis hans, þegar hann gekk laus í merastóði í Laxárdal í Austur-Húnavatnssýslu í allt sumar.

Upp komst um kauða þegar verið var að smala hrossastóði í Skrapatungurétt nýverið því þar var hann í miðjum hópi mera og folalda. Samkvæmt búfjárlögum er lausaganga svonefnds graðpenings stranglega bönnuð.

Fréttablaðið greinir frá því að folinn þyki stór og þroskalegur og því til alls líklegur, í óþökk bænda sem eiga hryssurnar á afréttinum. Bændur, sem eru að rækta upp hrossakyn munu þurfa að láta ómskoða hryssur sínar og jafnvel eyða fyli eða fóstri eins og það heitir á máli mannanna með ærnum tilkostnaði. Enginn vill hins vegar kannast við að eiga folann og er því vandséð hvernig sækja megi einhvern til saka nema folann sjálfan.