Fjöldi fólks mættur til að fylgjast með Iceland Airwaves

Bandaríski stórleikarinn Harrison Ford er meðal þeirra sem er mættir eru til landsins til að fylgjast með Iceland Airwaves tónlistarhátíðinni sem hófst í gær. Í fréttamolum frá aðstandendum hátíðarinnar segir að Harrison Ford ætli í kvöld á NASA til að fylgjast með íslensku hljómsveitinni Ælu.

Nánast er uppselt á hátíðina en aðeins eru sextíu miðar eftir. Aldrei hafa verið jafn margir fjölmiðlamenn verið á hátíðinni en tónlistarstöðin MTV og tímaritið Rolling Stones eru meðal þeirra sem fylgjast með í ár.

Í kvöld verða allir sjö tónleikastaðir hátíðarinnar komnir í gagnið og eru Tilly and The Wall og Klaxons meðal þeirra sem troða upp.

Eldar Ástþórsson, framkvæmdastjóri hátíðarinnar, segir aðstandendur ánægða með opnunarkvöldið í gær. Æstir tónlistarunnendur létu sig ekki vanta og var Gaukurinn yfirfullur þegar bandaríska rokksveitin We are Scientists steig á stokk.