Um fjörtíu eftirskjálftar við Flatey

Um fjörtíu eftirskjálftar hafa mælst við Flatey á Skjálfanda eftir að snarpur skjálfti upp á 4,5 á Richter mældist þar fimm mínútur í tvö í dag. Fyrstu mælingar bentu til þess að skjálftinn hefði verið 5 á Richter en mælingar Veðurstofunnar sýna að hann var 4,5. Upptök skjálftans voru um átta kílómetra út af Flatey á Skjálfanda og varð hans víða vart á Norðurlandi. Samkvæmt upplýsingum frá Veðurstofunni bendir ekkert til að annar stór skjálfti muni fylgja á eftir.