Kia neitaði tilboði Barcelona

Breska blaðið Daily Mail heldur því fram í dag að milljónamæringurinn Kia Joorabchian sem á kaupréttinn á Argentínumanninum Carlos Tevez, hafi hafnað kauptilboði Barcelona í kappann í dag.

Tevez er frábær knattspyrnumaður og er almennt álitinn einn efnilegasti framherji heimsins, en hann hefur alls ekki náð sér á strik með enska liðinu það sem af er leiktíðar. Barcelona er sagt hafa reynt við framherjann í kjölfar þess að Eiður Smári meiddist í Meistaradeildinni og því er orðið fátt um leikhæfa framherja í herbúðum Evrópumeistaranna.