Hjúkrunarfræðingaskortur á næstu árum

Um 40% allra starfandi hjúkrunarfræðinga láta af störfum vegna aldurs á næstu 10-15 árum og ef takast á að manna stéttina þarf að fjölga nýnemum í hjúkrunarfræði. Þetta kemur fram í ályktun Hjúkrunarþings sem lauk í gær.

Í ályktuninni fagna hjúkrunarfræðingar ákvörðun stjórnvalda að fjölga nýnemum í hjúkrunarfræði við Háskóla Íslands um tuttugu og fimm, en síðustu ár hafa áttatíu nýnemar sloppið í gegnum klásusinn. Babb hafi hins vegar komið í bátinn þegar menntamálaráðherra ákvað nýverið að skipta þessum plássum á milli Háskóla Íslands og Háskólans á Akureyri, 15 til Reykjavíkur en 10 til Akureyrar. Halla Grétarsdóttir starfandi formaður Félags hjúkrunarfræðinga sagði í samtali við fréttastofu nú í morgun að Landspítalinn hefði gert ráðstafanir til að taka á móti þessum aukna fjölda í verknám og þetta komi sér því illa. Fyrirsjáanlegt sé að mun meiri skortur verði á hjúkrunarfræðingum á höfuðborgarsvæðinu og því hefði félagið kosið að staðið hefði verið við þessa ákvörðun gagnvart Háskóla Íslands og næsta skref væri þá að fjölga nýnemum í Háskólanum á Akureyri. Í dag eru í kringum 2700 starfandi hjúkrunarfræðingar á landinu en samkvæmt mannaflaspá heilbrigðisráðuneytisins verður þörf fyrir allt að fjögur þúsund í náinni framtíð.