Fjármunir af söluandvirði Símans fluttir milli ára

Fjármunum af söluandvirði Landssímans sem verja átti til gerðar Sundabrautar seinkar að hluta um eitt ár samkvæmt stjórnarfrumvarpi sem lagt hefur verið fram á Alþingi. Upphaflega var áætlað að verja einum og hálfum milljarði króna til verksins á næst ári og 2,5 milljörðum árið 2008 en samkvæmt frumvarpinu verður aðeins 100 milljónum króna varið til Sundabrautar á næsta ári og 3.900 milljónum króna árið 2008.

Í frumvarpinu er enn fremur lagt til að 600 milljónum króna sem verja átti til gatnamóta við Nesbraut á næsta ári verði skipt á tvö ár, þ.e. 400 milljónir á næsta ári og 200 milljónir árið 2008. Í þriðja lagi er lagt til að til Tröllatunguvegar um Arnkötludal verði varið 200 milljónum króna árið 2007 og 600 milljónum árið 2008 í stað 400 milljóna hvort ár. Í fjórða lagi er svo lagt til að áður ákveðið 300 milljóna króna framlag til Norðausturvegar fyrir árið 2007 verði fært yfir á árið 2008 og verður framlag þess árs þá 700 milljónir króna.

Þá er lagt til í frumvarpinu að þeim þremur milljörðum króna sem verja á til kaupa eða leigu á eftirlitsflugvél og fjölnota varðskipi fyrir Landhelgisgæsluna verði varið þannig að 500 milljónir falli á þessu ári 2006, annað eins á næsta ári og tveir milljarðar árið 2008. Þá er enn fremur lagt til að hálfs milljarðs króna framlag í Fjarskiptasjóð falli á þessu ári í stað næsta árs.300 milljóna króna framlag

til Nýbyggingar fyrir Stofnun íslenskra fræða fyrir árið 2007 verður auk þess fært yfir á árið 2008 ef frumvarpið verður samþykkt og falla því samtals 600 milljónir króna til verkefnisins það ár.

Í frumvarpinu er því samtals lagt til að 2,4 milljarðar af Landssímafénu sem ráðstafa átti á næsta ári verði fluttir til ársins 2008 og einn milljarður sem ráðstafa átti á næsta ári falli til á þessu ári.