Eggert ætlar með West Ham í meistaradeildina

Eggert Magnússon, verðandi formaður fótboltafélagsins West Ham í Lundúnum, sagði í viðtali við sjónvarpsstöð félagsins að hann ætlaði félaginu að keppa um sæti í meistaradeild Evrópu. Hann tók þó fram um leið að hann aðhylltist þróun frekar en byltingu hjá félaginu og mest áhersla yrði lögð á að ala upp leikmenn hjá félaginu. .

Einnig kom fram að Eggert ætlar sér að segja af sér sem formaður íslenska knattspyrnusambandsins þegar næsti aðalfundur þess verður haldinn en það verður í febrúar á næsta ári. Ástæðuna sagði hann vera að hann vildi sýna stuðningsmönnum félagsins og öllum þeim sem kæmu nálægt starfsemi þess að honum væri fúlasta alvara með West Ham og að hann myndi verða virkur í starfi félagsins.

Þetta kom fram á íþróttafréttavef Sky sjónvarpsstöðvarinnar.