Vogunarsjóðir gegn Stork

Vogunarsjóðirnir Centaurus og Paulson, sem eiga samanlagt um 32% hlutafjár í hollensku fyrirtækjasamstæðunni Stork, hafa sett fram kröfu um að haldinn verði sérstakur hluthafafundur til að taka fyrir vantrausttillögu á stjórn félagsins.

Sjóðirnir gera ennfremur kröfu um að hluthafar fái að taka afstöðu til fyrirtækjakaupa eða sölu á hluta fyrirtækisins sem nemur meira en 100 milljónum evra.

Eignarhaldsfélagið LME, sem er í eigu Marels, Eyris og Landsbankans, á um 8% hlut í Stork. Marel hefur átt í óformlegum viðræðum við stjórnendur Stork um að kaupa þann hluta fyrirtækisins sem er í svipuðum rekstri og Marel, en stjórnendur Stork hafa einnig lýst vilja til að stækka þá rekstrareiningu, til dæmis með því að kaupa Marel.

Í Vegvísi greiningardeildar Landsbankans í dag segir að vogunarsjóðirnir tveir vilja kljúfa fyrirtækið upp og selja hluta þess. Þeir hafi haft betur  í atkvæðagreiðslu á sérstökum hluthafafundi fyrir rúmum mánuði en stjórn félagsins hafnaði þeirri niðurstöðu nýlega.

Greiningardeildin hefur eftir yfirlýsingu frá stjórn Stork í gær en þar ítrekaði hún andstöðu sína við hugmyndir um að skipta félaginu upp. Þar er m.a. haft eftir framkvæmdastjóra Stork að umrótið í kringum félagið haldi áfram og muni augljóslega hafa neikvæð áhrif á það.

Centaurus og Paulson hóta því að fara með málið fyrir dóm verði stjórnin ekki við kröfum þeirra, að því er greiningardeildin segir.