Átta mánaða fangelsi fyrir fíkniefnabrot

Héraðsdómur Suðurlands dæmdi í morgun karlmann í átta mánaða fangelsi fyrir tvö fíkniefnabrot fyrr á þessu ári. Í fyrra tilvikinu var hann handtekinn eftir að tvær e-pillur og rúm tvö grömm af hassi fundust á honum en í síðara tilvikinu fundust nærri 15 grömm af amfetamíni og tæp 80 grömm af hassi.

Maðurinn játaði brot sín en hann hafði þrisvar áður sætt refsingu vegna lögbrota, þar á meðal fíkniefnabrota, og með brotunum nú rauf hann skilorð. Segir í dómnum að um mikið magn fíkniefna sé að ræða í málinu og ótrúlegt að það hafi verið ætlað til eigin neyslu. Þótti átta mánaða fangelsi því hæfileg refsing auk þess sem fíknifefni voru gerð upptæk með dómnum.