3000 miðar seldust á fyrstu klukkustundunum

Þrjú þúsund miðar seldust á nokkrum klukkustundum á fyrstu tónleika Bjarkar á Íslandi í sex ár. Miðasalan hófst á hádegi og fór gífurlega vel af stað, segja tónleikahaldarar. Alls verða 5500 miðar seldir á tónleikana sem verða mánudaginn níunda apríl í Laugardalshöll.

Tónleikarnir verða þeir fyrstu í heimstónleikaröð Bjarkar til kynningar á nýjustu breiðskífu hennar, Volta. Heimsviðburður var á Kaffibarnum nú síðdegis þegar Volta var frumflutt fyrir fjölmiðlafólk en hún kemur formlega út þann sjöunda maí.