Pabbi Madeleine snýr aftur til vinnu

Gerry McCann, faðir týndu stúlkunnar Madeleine, ætlar að hefja fulla vinnu um áramót. Hjónin Gerry og Kate McCann hafa helgað sig leitinni að dóttur sinni sem hvarf af hótelherbergi í Portúgal í Maí og verið í ólaunuðu leyfi.

Gerry, sem er hjartalæknir, hefur þegar hafið störf á spítala í Leicester en vinnur bara nokkra tíma á viku á meðan hann reynir að koma fjölskyldulífinu í eðlilegt horf á ný. Kate McCann, sem er heimilislæknir, segist hins vegar ekki getað hugsað sér að snúa aftur til vinnu fyrr en Madeleine kemur í leitirnar.