Adriano hættur?

Brasilískir fjölmiðlar baða sig nú í fréttum af framherjanum Adriano hjá Inter Milan. Dagblaðið Lance heldur því fram í dag að Adriano hafi tilkynnt Dunga landsliðsþjálfara að hann ætlaði að hætta að spila fótbolta eftir landsleik Brasilíumanna við Perú á dögunum.

Hinn 27 ára gamli Adriano er enn í Brasilíu eftir að hafa svikist um að snúa aftur til Ítalíu eftir landsleikjahlé. Talsmaður kappans segir að hans sé ekki að vænta til Evrópu á ný fyrr en eftir páska. Sagt er að Adriano sé í Rio hjá fjölskyldu sinni þar sem hann sé að leysa persónuleg mál sín.