Engin kauptilboð borist í Ibrahimovic

Umboðsmaður framherjans Zlatan Ibrahimovic hefur staðfest að engin kauptilboð hafi enn borist í skjólstæðing sinn en bæði Barcelona og Real Madrid eru talin hafa áhuga á Svíanum.

„Við höfum ekki fengið að vita neitt og eins og staðan er núna þá verður Ibra áfram hjá Inter. Það er í raun ekkert að gerast í þessum málum núna því leikmaðurinn er bara í fjölskyldufríi og við munum fara yfir málin með forsetanum Massimo Moratti þegar hann kemur aftur," segir umboðsmaðurinn Minao Raiola í samtali við Rai sjónvarpsstöðina.