Vieri fór í fússi frá Atalanta

Framherjinn Christian Vieri hefur yfirgefið herbúðir Atalanta á Ítalíu þegar enn eru tveir mánuðir eftir af leiktíðinni.

Fyrrum landsliðsmaðurinn er sagður hafa fengið nóg af þeirri hörðu gagnrýni sem hann hefur legið undir hjá stuðningsmönnum félagsins og hefur fengið samningi sínum rift.

Hinn 35 ára gamli markahrókur spilaði aðeins níu leiki fyrir Atalanta í vetur og skoraði í þeim tvö mörk. Þetta var í þriðja sinn sem hann spilaði fyrir félagið á löngum ferli.

Vieri hefur skorað 142 mörk í ítölsku A-deildinni á ferlinum og var markahæsti leikmaður Ítala á HM árið 1998 með fimm mörk. Hann var þar að auki markakóngur á Spáni árið 1997 þegar hann lék með Atletico Madrid, en þá skoraði hann 24 mörk í 24 leikjum.